Skilmálar fyrir vefverkefni, á mannamáli

Þessir skilmálar gilda um verkefni sem Íslandsvefir vinna fyrir viðskiptavini: hönnun og smíði vefja og netverslana, samþættingar og sérforritun, leitarvélabestun og stafræna markaðssetningu. Þeir segja hvernig samstarfið gengur fyrir sig, hver ber ábyrgð á hverju og hvað gerist ef eitthvað fer úrskeiðis.

Samningsaðilar

Seljandinn er Gagnaver Datacenter AB, skráð í Svíþjóð, sem rekur Íslandsvefi. Viðskiptavinurinn ert þú, oftast fyrir hönd fyrirtækis eða stofnunar. Ef þú ert neytandi — einstaklingur sem kaupir þjónustu til eigin nota — kunna lög að veita þér frekari rétt, og þessir skilmálar skerða hann ekki.

Tilboð og samningur

Hvert verkefni byggir á skriflegu tilboði eða verklýsingu sem segir hvað er innifalið, hvað það kostar og hvernig verkinu er skipt í áfanga. Tilboð gildir í 30 daga frá því að það er sent. Samningur kemst á þegar þú samþykkir tilboðið skriflega innan þess tíma, til dæmis í tölvupósti.

Ef tilboðið og þessir skilmálar stangast á gildir tilboðið.

Verð og greiðslur

Verð eru í íslenskum krónum og gefin upp án virðisaukaskatts. Þar sem seljandinn er skráður í Svíþjóð eru reikningar til fyrirtækja á Íslandi gefnir út með öfugri skattskyldu (e. reverse charge): kaupandinn gerir sjálfur skil á virðisaukaskattinum á Íslandi.

Gjalddagi reikninga er 14 dögum eftir útgáfudag. Sérsmíðuð verkefni eru innheimt í þremur hlutum:

• 30% þegar verkið hefst,
• 40% þegar þú samþykkir hönnunina,
• 30% þegar vefurinn fer í loftið.

Í áskrift er stofngjaldið innheimt í upphafi og mánaðargjaldið mánaðarlega fyrir fram.

Ef reikningur er ekki greiddur á gjalddaga reiknast dráttarvextir samkvæmt gildandi lögum.

Breytingar á umfangi

Það er eðlilegt að hugmyndir breytist á meðan á verki stendur. Breytingar sem falla utan tilboðsins metum við, segjum hvaða áhrif þær hafa á kostnað og tíma og vinnum þær aðeins þegar þú hefur samþykkt þær skriflega.

Það sem þú leggur til

Verkefni gengur best þegar báðir aðilar standa við sitt. Þú sérð um að:

• útvega efni, myndir og upplýsingar sem samið er um, á réttum tíma,
• veita aðgang að kerfum, léni og þjónustum sem verkið þarf,
• gefa endurgjöf og taka ákvarðanir innan hæfilegs tíma,
• eiga rétt til að nota það efni sem þú lætur okkur í té, til dæmis myndir, texta og vörumerki.

Ef efni eða endurgjöf tefst getur tímaáætlunin færst til sem því nemur.

Afhending og samþykki

Við afhendum verkið á prufuvef áður en það fer í loftið. Þú ferð yfir það og lætur vita af villum eða frávikum frá tilboðinu, og við lögum þau. Verkið telst samþykkt þegar þú samþykkir útgáfu, eða þegar vefurinn hefur verið tekinn í notkun.

Í 30 daga eftir að vefurinn fer í loftið lögum við án endurgjalds allt sem virkar ekki eins og um var samið. Nýjar óskir og breytingar teljast ný vinna og við gerum tilboð í þær sérstaklega.

Hugverkaréttur

Sérsmíðuð verkefni. Þegar verkefnið hefur verið greitt að fullu færð þú full réttindi yfir hönnuninni og þeim kóða sem við skrifum sérstaklega fyrir þig. Íslandsvefir halda rétti til að nota áfram almenna hluta, verkfæri og þekkingu sem ekki eru sérstök fyrir þitt verkefni.

Áskriftarvefir. Hönnunin, útlitssniðið og kerfið sem vefurinn keyrir á eru eign Íslandsvefja á meðan áskriftin stendur.

Efnið þitt er alltaf þitt. Textar, myndir og gögn sem þú leggur til eru alltaf í þinni eigu, hvort sem vefurinn er sérsmíðaður eða í áskrift. Við mælum líka með að lénið sé skráð á þig.

Opinn hugbúnaður, letur, viðbætur og önnur verk þriðja aðila sem vefurinn byggir á fylgja eigin leyfisskilmálum.

Verkasafn. Íslandsvefir mega sýna verkefni sem er lokið í verkasafninu og í kynningarefni: nafn þitt eða fyrirtækisins, skjámyndir og lýsingu á verkefninu, nema um annað sé samið skriflega. Við birtum aldrei trúnaðarupplýsingar.

Hýsing, rekstur og þjónustustig

Þessir skilmálar ná til verkefnavinnu, ekki hýsingar. Íslandsvefir lofa hvorki uppitíma né viðbragðstíma í rekstri samkvæmt þessum skilmálum.

Ef vefurinn er hýstur hjá Gagnaveri — hýsingarþjónustu sama félags — gilda um hýsinguna skilmálar og þjónustustig Gagnavers, sem eru birtir á gagnaver.is. Ef þú semur um áframhaldandi viðhald eða umbætur er það gert í sérstöku tilboði.

Trúnaður

Við förum með upplýsingar um rekstur þinn, aðgangsorð og gögn sem trúnaðarmál og notum þau aðeins í þágu verkefnisins. Um persónuupplýsingar sem við meðhöndlum á vefnum þínum gildir persónuverndarstefnan og vinnslusamningur.

Ábyrgð og takmörkun hennar

Við berum ábyrgð á tjóni sem við völdum með því að standa ekki við samninginn, eftir því sem lög segja til um. Við berum ekki ábyrgð á óbeinu tjóni, svo sem töpuðum hagnaði, né á efni sem þú leggur til, breytingum sem aðrir gera á vefnum eða þjónustu þriðja aðila sem vefurinn tengist.

Ábyrgð okkar takmarkast við þá upphæð sem greidd hefur verið fyrir verkefnið eða áfangann sem málið varðar. Takmörkunin gildir ekki um tjón sem valdið er af ásetningi eða stórfelldu gáleysi, né þar sem ófrávíkjanleg lög koma í veg fyrir hana.

Uppsögn verks

Hvor aðili getur sagt verkinu upp skriflega með 30 daga fyrirvara. Þú greiðir fyrir þá vinnu sem unnin er til loka uppsagnarfrestsins, og við afhendum það sem er tilbúið.

Lög og varnarþing

Sænsk lög gilda um samninginn, þar sem seljandinn er skráður og starfar í Svíþjóð.

Ágreiningur sem ekki leysist í sátt fer fyrir sænska dómstóla, og Göteborgs tingsrätt (héraðsdómur í Gautaborg, þar sem félagið hefur aðsetur) er fyrsta dómstig.

Ef þú ert neytandi heldur þú þeirri vernd sem ófrávíkjanleg neytendalög í þínu heimalandi veita þér.