Vefurinn á að virka fyrir öll

Þetta er aðgengisyfirlýsing fyrir islandsvefir.is. Hún segir að hverju við stefnum, hvernig við prófum, hvað við vitum að vantar og hvernig þú kemur ábendingu til okkar.

Að hverju við stefnum

Við stefnum að því að vefurinn uppfylli WCAG 2.2 á stigi AA. Það eru alþjóðleg viðmið um að vefir séu nothæfir fyrir fólk sem notar skjálesara, lyklaborð eingöngu eða stækkun, sér illa liti eða á erfitt með fínhreyfingar.

Við smíðum vefi fyrir aðra og segjum að aðgengi sé hluti af smíðinni, ekki aukahlutur. Þessi vefur er prófsteinninn á það.

Hvernig við prófum

• Sjálfvirkar aðgengisprófanir (axe-core) keyra á hverri síðu vefsins, bæði í síma- og tölvustærð, á meðan hann er þróaður.
• Birtuskil allra lita í hönnunarkerfinu eru prófuð sjálfvirkt: texti nær minnst 4,5:1 og útlínur stýringa minnst 3:1.
• Við prófum að valmyndir, síur og verkefnaformið virki án JavaScript.
• Við förum sjálf yfir síðurnar með lyklaborði.

Sjálfvirkar prófanir finna þó ekki allt. Óháð úttekt hefur ekki enn verið gerð, en unnið er að henni. Þangað til segjum við ekki að vefurinn uppfylli WCAG 2.2 AA — við segjum að við stefnum þangað.

Það sem vefurinn gerir

• Fyrirsagnir og kennileiti (landmarks) eru merkt, svo skjálesarar geti flakkað um síðurnar.
• Hægt er að nota vefinn með lyklaborði einu saman, og það sést alltaf hvar fókusinn er.
• Hlekkur efst á hverri síðu stekkur beint í meginefnið.
• Reitir í forminu hafa sýnilegar merkingar, og villuskilaboð birtast við reitinn sem á í hlut og eru tengd honum.
• Tungumál hverrar síðu er merkt, svo skjálesari beri textann rétt fram.
• Hreyfing er lítil og slokknar ef þú hefur beðið um minni hreyfingu í stýrikerfinu.
• Litir eru aldrei eina leiðin til að skilja hvað er í gangi.

Það sem vantar

• Verkefnaformið opnar póstforritið þitt til að senda skilaboðin. Ef þú notar ekki póstforrit getur þú skrifað beint á netfangið okkar eða hringt.
• Vefurinn hefur ekki verið prófaður til hlítar með skjálesurum á öllum stýrikerfum.
• Þegar þú síar verkefni eða greinar breytist talan yfir niðurstöðunum á skjánum, en ekki er víst að allir skjálesarar lesi nýju töluna upp.
• Skjámyndir af vefjum í verkefnasafninu eru myndir. Textalýsing fylgir þeim, en hún getur ekki lýst öllu sem sést.

Ef eitthvað af þessu hindrar þig, hafðu samband. Við aðstoðum þig beint á meðan við lögum vefinn.

Ef eitthvað virkar ekki fyrir þig

Segðu okkur frá því. Best er að segja hvaða síðu málið snýst um, hvað þú varst að reyna að gera og hvað gerðist — og hvaða vafra eða hjálpartæki þú notar, ef þú veist það.

Manneskja les hverja ábendingu og svarar. Við segjum þér hvað við getum lagað og hvenær, og ef lagfæringin tekur tíma finnum við aðra leið fyrir þig á meðan.

Um yfirlýsinguna

Yfirlýsingin á aðeins við islandsvefir.is, ekki vefi sem við smíðum fyrir aðra. Við uppfærum hana þegar vefurinn breytist eða úttekt liggur fyrir.